Edhe pse nuk dihet ende sa ekipe do të jenë pjesëmarrëse në Superligë, sepse flitet që mund të jenë 10, me Ponte Prizrenin e rikthyer dhe KEK-un humbës të finales – Grapeland Rahoveci nuk dëshiron të lë për momentin e fundit vendimet për ekipin e ri të Superligës.
Me të përfunduar finalja ekipi ka festuar në n’Qosh Bar, një festë shumë e merituar pas suksesit të arritur.
Festën e bëri më të bukur rikthimi nga 0-1 në seri, pas humbjes së parë në shtëpi, duke tejkaluar një barrierë masive mentale, pasi edhe ndeshja e tretë ishte mjaft dramatike.
Nëse duam të ndalemi tek finalja, është një film që as skenaristi më i çmendur nuk do të dinte që ta realizonte – ulje, ngritje dhe krejt Rahoveci në sallë që shtyu kapitenin Bardh Rexha drejt një prej performancave më masive në histori.
Por, përkundër këtij gëzimi masiv të qytetit, kryesia e klubit që përfundoi finalen pa asnjë incident të vetëm, po mendon për lëvizjet e para.
Gjithmonë sipas burimeve të Rahoveci24 tashmë ka filluar puna për edicionin e ri, ku nevojitet kyçja e sponsorëve të mëdhenj – me kontaktet me shumë lojtarë që tashmë kanë nisur.
Fokusi do të jetë në pozita të ndryshme, aty ku çaloi ekipi, dhe këtu do të kryejnë punë edhe përforcimet e huaja.
Tek reparti i të hujave, Grapeland Rahoveci kishte vetmë një apo dy të huaj në përiudha të ndryshme, kurse sezoni i ri nuk do të nisë pa së paku katër të huaj, sipas burimeve.
Grapeland Rahoveci nuk ka synime abnormale për sezonin e ri sepse buxheti i ekipeve tjera do të jetë shumëfish më i madh, por klubi beson që me lëvizjet e duhura, sponsorët që do të kyçen – do t’ia dalin të jenë befasi e këndshme e Superligës në vitin e parë, gjithnjë duke llogaritur edhe në përkrahjen e publikut, pasi konkurrenca pritet të jetë ekstremisht e madhe.
/Rahoveci24/