Ministria e Mjedisit dhe Planifikimit Hapësinor (MAPL) me anë të një komunikate ka konfirmuar financimin e rregullimit të lumenjve të Rahovecit.
Mbështetja u rikonfirmua me vizitën e ministrit Ferid Agani në Rahovec, u prit nga kryetari, Idriz Vehapi, drejtori i Urbanizmit, Fehmi Hoxha dhe drejtori për Shëndetësi, Munib Durguti.
Ja komunikata e plotë e ministrisë:
Ministri i Mjedisit dhe Planifikimit Hapësinor, Ferid Agani, ka realizuar sot një vizitë në Komunën e Rahovecit, ku është pritur nga kryetari Idriz Vehapi. Qëllimi i vizitës ishte njoftimi për së afërmi me gjendjen në fushën e mjedisit dhe projektet e tjera që ndërlidhen me këtë ministri.
Ministri Agani konfirmoi se tashmë janë ndarë mjetet financiare për rregullimin e shtratit të lumit “Dullo”, dhe atij “Remnik”, dhe do të shikohet mundësia e përkrahjes edhe të projekteve të tjera të cilat janë në interes të të gjithë banorëve të Komunës së Rahovecit, transmeton RahovecPress.
Për rregullimin e shtratit të lumit “Dullo” i cili kalon nëpër qytetin e Rahovecit për vitin 2016 janë ndarë 50 mijë euro, kurse për ndërtimin e shtratit të lumit “Remnik”, i cili kalon nëpër fshatin Fortesë për vitin 2016 janë ndarë 34 mijë euro.
Agani tha se janë dhe disa çështje të tjera, siç është zbatimi i udhëzimit administrativ për hartat zonale, që është po ashtu një projekt madhor, për të cilin duhet të kemi koordinim me të gjitha komunat e vendit.
Kryetari i Rahovecit, Idriz Vehapi, e falënderoi ministrin Agani, për ndarjen e mjeteve financiare për rregullimin e shtretërve të lumenjve “Dullo” dhe “Remnik”, investime këto që kanë për qëllim mbrojtjen e mjedisit në këtë komunë.
Vehapi, po ashtu, kërkoi nga ministri Agani, mbështetjen edhe të projekteve të tjera siç janë projekti i lumit në fshatin Zoqishtë dhe projekti tjetër që ka të bëjë me ndërtimin e ndërtesës për banim social, projekt ky i cili ka filluar gjatë vitit 2015.
